హైదరాబాద్ లో భారీ వర్షానికి చార్మినార్ పెచ్చులు ఊడిపడ్డాయి. హైదరాబాద్ లో గురువారం వర్షం బీభత్సం సృష్టించింది. చాలా ప్రాంతాల్లో రోడ్లు నీట మునిగాయి. ఉరుములు, మెరుపులతో వాన దంచికొట్టింది. చాలా ప్రాంతాల్లో ట్రాఫిక్ జామ్ అయింది. పాతబస్తీలో గంటపాటు భారీ వర్షం కురిసింది.
అయితే ఈ వర్షాల వల్ల చార్మినార్‌కు కూడా నష్టం వాటిల్లింది. పెచ్చులు ఊడిపోయి భాగ్యలక్ష్మి అమ్మవారి ఆలయం ముందు పడ్డాయి. గతంలో రిపేర్ చేసిన మీనార్ నుంచే పెచ్చులు ఊడిపడ్డాయి. పెచ్చులు పడినప్పుడు అక్కడ ఎవరూ లేకపోవడంతో ప్రమాదం తప్పింది.
కానీ చార్మినార్ చూడటానికి వచ్చిన పర్యాటకులు భయంతో పరుగులు తీశారు. సమాచారం అందుకున్న వెంటనే అధికారులు ఘటనా స్థలానికి చేరుకున్నారు. పరిస్థితిని సమీక్షించారు. జీహెచ్‌ఎంసీ సిబ్బంది ఊడిపోయిన పెచ్చులను శుభ్రం చేశారు. చార్మినార్‌కు మరోసారి మరమ్మతులు చేస్తామని అధికారులు చెప్పారు.
హైదరాబాద్ లో గురువారం పడ్డ వర్షానికి ఖైరతాబాద్‌లోని మెర్క్యూరీ హోటల్ వద్ద ఒక కారుపై చెట్టు కూలింది. ఈ సంఘటనలో కారు స్వల్పంగా దెబ్బతింది. కారులో ప్రయాణిస్తున్న ఇద్దరు మహిళలు సురక్షితంగా బయటపడ్డారు. దీంతో పెద్ద ప్రమాదం తప్పింది.
For more related news : https://theshakthi.com/category/categories/trending-news/
