ఐపీఎల్ 2025లో ప్లేఆఫ్స్ ఆశలు ఇప్పటికే గల్లంతైన లక్నో సూపర్‌జెయింట్స్ జట్టు అద్భుత ప్రదర్శనతో ఆకట్టుకుంది. పాయింట్ల పట్టికలో అగ్రస్థానంలో ఉన్న గుజరాత్ టైటాన్స్ కు షాకిస్తూ 33 పరుగుల తేడాతో విజయం సాధించింది. ఈ మ్యాచ్‌లో లక్నో బ్యాటర్ మిచెల్ మార్ష్ (117; 64 బంతుల్లో 10 ఫోర్లు, 8 సిక్సర్లు) ఆకాశమే హద్దుగా చెలరేగి శతకంతో కదం తొక్కగా, నికోలస్ పూరన్, మార్‌క్రమ్ అతడికి అండగా నిలిచారు. దీంతో లక్నో నిర్ణీత 20 ఓవర్లలో 2 వికెట్ల నష్టానికి 235 పరుగుల భారీ స్కోరు నమోదు చేసింది.
టాస్ గెలిచి బ్యాటింగ్ ఎంచుకున్న లక్నోకు ఓపెనర్లు మిచెల్ మార్ష్, మార్‌క్రమ్ (36; 24 బంతుల్లో 3 ఫోర్లు, 2 సిక్సర్లు) శుభారంభం అందించారు. ముఖ్యంగా మార్ష్ ఆరంభం నుంచే గుజరాత్ బౌలర్లపై విరుచుకుపడ్డాడు. మార్‌క్రమ్ ఔటయ్యాక క్రీజులోకి వచ్చిన నికోలస్ పూరన్ (56 నాటౌట్; 27 బంతుల్లో 4 ఫోర్లు, 5 సిక్సర్లు) మరింత వేగంగా ఆడాడు. మార్ష్ కేవలం 33 బంతుల్లో అర్ధశతకం పూర్తి చేసుకోగా, 56 బంతుల్లోనే శతకాన్ని అందుకున్నాడు.
రషీద్ ఖాన్ వేసిన ఒక ఓవర్లో మార్ష్ వరుసగా 6, 4, 6, 4, 4 బాది 24 పరుగులు రాబట్టాడంటే అతడి దూకుడును అర్థం చేసుకోవచ్చు. పూరన్ కూడా 22 బంతుల్లోనే అర్ధసెంచరీ పూర్తి చేశాడు. చివర్లో పంత్ (16 నాటౌట్) కూడా మెరవడంతో లఖ్‌నవూ స్కోరు 230 పరుగులు దాటింది. గుజరాత్ బౌలర్లలో సిరాజ్ మినహా మిగిలినవారంతా ధారాళంగా పరుగులు సమర్పించుకున్నారు.
ప్రసిద్ధ్ కృష్ణ వికెట్ తీయకుండా 44 పరుగులు ఇవ్వగా, రబాడా 45 పరుగులు సమర్పించుకున్నాడు. సాయికిశోర్, అర్షద్ ఖాన్ తలో వికెట్ పడగొట్టారు. లక్నో ఇన్నింగ్స్ సమయంలో గుజరాత్ పేసర్ అర్షద్ ఖాన్ బౌలింగ్ చేస్తూ రెండుసార్లు జారిపడటం మ్యాచ్‌కు స్వల్ప అంతరాయం కలిగించింది.
భారీ లక్ష్య ఛేదనలో గుజరాత్ టైటాన్స్ కూడా దూకుడుగానే ఇన్నింగ్స్ ఆరంభించింది. సాయి సుదర్శన్ (21) త్వరగానే వెనుదిరిగినా, శుభ్‌మన్ గిల్ (35; 20 బంతుల్లో 7 ఫోర్లు), జోస్ బట్లర్ (33; 18 బంతుల్లో 3 ఫోర్లు, 2 సిక్సర్లు) వేగంగా పరుగులు జోడించారు. ఒక దశలో 7 ఓవర్లకు 76/1తో గుజరాత్ పటిష్టంగానే కనిపించింది.
అయితే, గిల్, బట్లర్ స్వల్ప వ్యవధిలో ఔట్ కావడంతో జట్టు కష్టాల్లో పడింది. అనంతరం షెర్ఫేన్ రూథర్‌ఫర్డ్ (38; 22 బంతుల్లో 1 ఫోర్, 3 సిక్సర్లు), షారుఖ్ ఖాన్ (57; 29 బంతుల్లో 5 ఫోర్లు, 3 సిక్సర్లు) అద్భుతంగా పోరాడారు. వీరిద్దరూ కలిసి స్కోరు బోర్డును పరుగులు పెట్టించడంతో గుజరాత్ విజయానికి 4 ఓవర్లలో 54 పరుగులు అవసరమయ్యాయి. అయితే, కీలక సమయంలో ఒరూర్క్ బౌలింగ్‌లో రూథర్‌ఫర్డ్, తెవాటియా (2) ఔట్ కావడంతో గుజరాత్ ఆశలు సన్నగిల్లాయి.
షారుఖ్ ఖాన్ కూడా ఎక్కువసేపు నిలవలేకపోయాడు. చివరి ఓవర్లలో గుజరాత్ వరుసగా వికెట్లు కోల్పోయి ఓటమి చెందింది. లక్నో బౌలర్లలో ఒరూర్క్ 3 వికెట్లతో రాణించగా, పార్ట్‌టైమ్ స్పిన్నర్ ఆయుష్ బదోని చివరి ఓవర్లో రెండు వికెట్లు పడగొట్టి కేవలం 4 పరుగులే ఇచ్చాడు. ఆవేష్ ఖాన్ రెండు వికెట్లు తీశాడు.
For more related news : https://theshakthi.com/category/categories/trending-news/
